Plantun de Prouvènço

Pèr coumpara dos planto d'encò nostre

Arceuthobium gambyi & Vicia bithynica

Arceuthobium gambyi

Santalaceae

Nom en français : Arceutobe.

Descripcioun :
Lis arceutobe soun de planto sènso clouroufilo qu'an ges de fueio e que parasiton li genèbre. Li fru madur soun pas poupous au contre de li dóu visc. Aquéu d'aqui, Arceuthobium gambyi, vèn tout bèu just d'èstre dessepara de Arceuthobium oxycedri. Se n'en destrìo qu'èi mai fort dins tóuti si partido e peréu que se trovo majamen sus lou mourven e pas tant sus lou cade e lou genèbre coume lou segound.

Usanço :
Lis arceutobe aurien d'ùni prouprieta anti-bateriano.

Port : Pichoto planto lignouso
Taio : 5 à 20 cm
Fueio : ges
Tipe bioulougico : Camefite
Cicle bioulougico : Planto renadivo

Gènre : Arceuthobium
Famiho : Santalaceae

Ordre : Santalales

Coulour de la flour : Jauno
Petalo : 4
Ø (o loungour) flour : 1 mm
Flourido : Autouno - Ivèr

Sòu : Ca
Autour basso e auto : 0 à 800 m
Aparado : Noun
Remarco : Endemico d'Iberìo e de Prouvènço
Setèmbre à abriéu

Liò : Parasite sus li ramo de mourven, Juniperus phoenica
Estànci : Mesoumediterran à Subremediterran
Couroulougi : Mediterrano-Nord-Ouèst
Ref. sc. : Arceuthobium gambyi Fridl., 2015

Vesso(-de-Bitinìo)

Vicia bithynica

Fabaceae Leguminosae

Nom en français : Vesce de Bithynie.

Descripcioun :
Aquelo vesso, pulèu grando, porto de flour groupado de uno à tres, di dos coulour (blanco e vióuleto), emé un pecou mai o mens long (1 à 6 cm). Vèn bèn dins li relarg séusous. Li fueio d'en bas an un parèu de fueioun, e mai pèr li fueio d'en aut (2 à 3 parèu emé uno vediho). Li dóusso soun pelouso (de 2,5 à 5 cm). Poudès peréu aluca lis estipulo que dounon d'èr à d'alabardo.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).